Kelingan Lan Kelangan
Karya Pakne Andi
Kagyat ana nawala warna biru dirgantara
Kalumarapna pak pos
Boya sapa kang kirim saka manca nagara
Kumesar rasa jroning dhadha
Pranyata sliramu esih “kelingan”
Yen nilar kanca ing Semarang
Kang nate dadi kadang titimbangan
Pirang warsa wus lelana ing brayan manca Nagara
Datan ana pawarta sapala
Surasaning nawala minta apuranta wus cidra janji
Paseduluran minta katerusna
Uwis, ya uwis dakapuranta kala samana
Nalika sliramu wis tindak lelana
Kanthi ikhlas tulusing nala
Krana wis dadi kersane Kang Maha Kuwasa
Nora susah dipukir dawa-dawa
Tansaha bekti lan leladi garwa putra
Mugi manggiha raharja basuki
Sandyan rinasa aku wis “kelangan”
Gusti bakal paring nugraha
Mring umate kang tansah sabar lan tawakal
Atur syukur, wis kuwawa nampa paringe pancoban
Mung titip piweling lan tansaha “kelingan“
Nyanyian “Rayuan Pulau Kelapa“
Bumi Pertiwi Indonesia wutah getihira
Nganti kapan wae Gusti Paring Yuswa
Post a Comment
Post a Comment